Kompetencat e pushtetit lokal rregullohen me Kushtetutën e Kosovës dhe me Ligjin për Vetëqeverisje Lokale. Qëllimi i këtij ligji është që të mundësohet ekzistimi i një sistemi të qëndrueshëm të vetëqeverisjes lokale dhe të përmirësimit të efikasitetit të shërbimeve publike.

Në Kosovë, kompetencat e komunës ndahen në kompetenca vetanake, të deleguara dhe kompetenca të zgjeruara.

Organizimi i qeverisë lokale në Kosovë është bazuar mbi parimet evropiane të institucioneve lokale vetëqeverisëse. Organet komunale që përfaqësojnë pushtetin lokal janë kuvendi i komunës dhe kryetari.

Kryetari i komunës zgjedhet me votën e drejtpërdrejtë të qytetarëve. Administrata e komunës organizohet në drejtorate, të cilat udhëhiqen nga drejtorët, që emërohen dhe shkarkohen nga kryetari i komunës. Numri i drejtorive ndryshon nga komuna në komunë, më së shumti janë 14 drejtori ndërsa më së paku janë 4.

Për më shumë komunat kanë të drejtë që të hyjnë në bashkëpunim me komunat tjera me qëllim të zhvillimit dhe interesave të përbashkëta. Veprimtaria e organeve komunale në kuptimin e hierarkisë është subjekt i kontrollit nga Ministria e Administrimit të Pushtetit Lokal dhe ministrive të tjera sektoriale.